ലോകജനതയെ ആകർഷിച്ച ഇന്ത്യയിലെ ധവള വിപ്ലവത്തിൻ്റെ ഈറ്റില്ലമാണ് ഗുജറാത്തിലെ ആനന്ദ്. ആനന്ദിലാരംഭിച്ച ഈ വിപ്ലവം ഇന്ത്യയിലെ എല്ലാ സംസ്ഥാനങ്ങളിലുമായി വ്യാപിപ്പിക്കപ്പെടുകയും അങ്ങനെ ലോകത്തിലെ ഏറ്റവും വലിയ പാലുൽപ്പാദന രാജ്യമെന്ന ബഹുമതി നമ്മുടെ രാജ്യം കൈവരിക്കുകയുണ്ടായി. ഈ ധവള വിപ്ലവത്തിൻ്റെ ശില്പിയാകട്ടെ ലോക പ്രശസ്തനായ ഡോ. വർഗ്ഗീസ് കുര്യൻ എന്ന മലയാളിയും.

1943-ൽ അമേരിക്കയിൽ എൻജിനീയറിംഗിൽ ബിരുദാനന്തര ബിരുദം സമ്പാദിച്ച് വന്ന ഡോ. കുര്യനെ ത്രിഭുവൻദാസ് പട്ടേൽ ഏൽപ്പിച്ച ഒരു ചെറിയ ദൗത്യമായിരുന്നു സാമ്പത്തികമായി ഏറെ പിന്നോക്കം നിന്നിരുന്നതും, സ്വകാര്യ കച്ചവടക്കാരുടെ ചൂഷണത്തിനു വിധേയമായി കഴിഞ്ഞിരുന്നതുമായ ഗുജറാത്തിലെ ക്ഷീര കർഷകരെ സഹായിക്കുക എന്നത്. ഇതിനായി അദ്ദേഹം തിരഞ്ഞെടുത്തത് കർഷകരാൽ കർഷകർക്കുവേണ്ടി കർഷകർ തന്നെ നയിക്കുന്ന ത്രിതല സഹകരണ സംവിധാനം ആയിരുന്നു. ഇങ്ങനെ ക്ഷീര കർഷകരെ അവരുടെ സ്വന്തം ബ്രാൻഡ് നെയിമിന്റെ കീഴിൽ അണിനിരത്തിക്കൊണ്ട് വിപണിയിലെ എല്ലാ സാധ്യതകളും നേരിട്ട് അനുഭവിക്കാനുള്ള സ്ഥിതി സംജാതമായി. 1980 കളിൽ ഈ സംവിധാനം കേരളത്തിൽ ആരംഭിച്ചപ്പോൾ തിരുവനന്തപുരം, എറണാകുളം മേഖലകൾ മാത്രമാണ് ഇതിനായി തിരഞ്ഞെടുക്കപ്പെട്ടത്. മലബാർ, ക്ഷീരോൽപ്പാദനത്തിന് ഒട്ടും യോജിച്ച ഇടമായി അന്ന് പരിഗണിക്കപ്പെട്ടിരുന്നില്ല എങ്കിലും പിന്നീട് 1990-ൽ മലബാർ മേഖലാ യൂണിയൻ ആരംഭിച്ചു. ഇന്ന് കേരളത്തിന്റെ മൊത്തം പാൽ ഉൽപ്പാദനത്തിന്റെ പകുതി ഭാഗവും മലബാറിൽ നിന്നാണ് ഉത്പ്പാദിപ്പിക്കുന്നത്.

കേരളത്തിൽ സഹകരണ മേഖലയിൽ ക്ഷീര കർഷകരുടെ സംരംഭത്തിന്റെ വാണിജ്യനാമമാണ് നമുക്കേവർക്കും സുപരിചിതമായ മിൽമ. പാലിന്റെ സംഭരണതലത്തിലുള്ള ഗുണനിലവാരം ഉറപ്പാക്കാൻ കേന്ദ്ര സഹായത്തോടെ ഗ്രാമതലത്തിൽ മിൽക്ക് ബൾക്ക് കൂളറുകൾ മിൽമ സ്ഥാപിച്ചിരുന്നു. 95 ശതമാനം പാലും സംഘംതല ശീതീകരണം കഴിഞ്ഞാണ് ഡെയറികളിൽ എത്തുന്നത്. ഇത് ഡയറി പ്ലാന്റുകളിൽ സംസ്കരിച്ച് പാലും മറ്റ് പാലുല്പന്നങ്ങളുമായി ജനങ്ങളിലെത്തിക്കുന്നു. ക്ഷീര വികസനത്തിനാവശ്യമായ സംഭരണ സംസ്കരണ വിപണന നിക്ഷേപങ്ങൾ കൃത്യമായ ദീർഘ വീക്ഷണത്തോടെ ആസൂത്രണം ചെയ്ത് അതിനാവശ്യമായ പണം സ്വന്തം വ്യാപാര ലാഭത്തിൽ നിന്നും കേന്ദ്ര-കേരള സർക്കാരുകളിൽ നിന്നും സ്വിസ് വികസന ഏജൻസി പോലെയുള്ള അഭ്യുദയകാംക്ഷികളിൽ നിന്നും ആകർഷിച്ച് മുന്നോട്ട്പോകുന്നതാണ് മിൽമയുടെ വികസന മാതൃക. ഉപഭോക്താവിൽ നിന്നും കരസ്ഥമാക്കുന്ന പണത്തിന്റെ 83 ശതമാനവും കർഷകരിലേക്ക് അടിസ്ഥാന പാൽവിലയും ലാഭവിഹിതവും ക്ഷീര കർഷകന്റെ സുസ്ഥിതിക്കുള്ള പദ്ധതികളുമായി തിരിച്ചെത്തിക്കാൻ മിൽമക്ക് സാധിക്കുന്നുണ്ട്. സുതാര്യവും സത്യസന്ധവും അതേസമയം ആധുനികവുമായൊരു പ്രവർത്തന രീതിയാണ് മില്മയുടേത്.

കാർഷിക മേഖലയിൽ വളരെ പ്രധാനപ്പെട്ട പങ്ക് വഹിക്കുന്ന ക്ഷീരമേഖലയിൽ കർഷകർക്ക് തങ്ങളുടെ പാൽ വില വളരെ കൃത്യനിഷ്ഠമായി എത്തിച്ചു നൽകുന്നതിൽ മിൽമ പ്രതിജ്ഞാബദ്ധമാണ്. പാലിന്റെ വില്പന വിലയുടെ 83.5% തുകയും കർഷകരിലേക്ക് നേരിട്ട് എത്തിക്കുന്നു സുതാര്യവും സത്യസന്ധവും അതേസമയം ആധുനികവുമായൊരു പ്രവർത്തന രീതിയാണ് മില്മയുടേത് എന്നത് കൂടാതെ ലഭിക്കുന്ന ലാഭം ഇൻസെന്റീവ് ആയിട്ടും അനവധി കർഷകക്ഷേമ പ്രവർത്തനങ്ങളിലൂടെയും കർഷകരിലേക്ക് തന്നെ എത്തിക്കുന്നു.

സഹകരണ മേഖലയിൽ നൂതന ആശയങ്ങൾ നടപ്പിലാക്കി വരുന്ന പ്രമുഖ സഹകരണ പ്രസ്ഥാനങ്ങളുടെ ശ്രേണിയിലേക്ക് നമ്മുടെ മിൽമ ഉയർന്ന് കഴിഞ്ഞു. അതിന്റെ ഭാഗമായി നാഷണൽ ഡയറി ഡെവലപ്മെന്റ് ബോർഡിൽ (NDDP) നിന്നും മികച്ച പ്രവർത്തനത്തിന് 2018-ൽ മിൽമക്ക് അവാർഡും ലഭിക്കുകയുണ്ടായി.

ലോകമെമ്പാടും പടർന്നു പിടിച്ച കൊറോണ രോഗബാധയെ തുടർന്ന് സമൂഹത്തിന്റെ സമസ്ത മേഖലകളും നിശ്ചലമായപ്പോൾ ക്ഷീര മേഖലയിലെ കർഷകർ ഉൽപ്പാദിപ്പിക്കുന്ന മുഴുവൻ പാലും സംഭരിച്ചു കൊണ്ട് സമയബന്ധിതമായി പാൽ വില നൽകാൻ ഈ പ്രസ്ഥാനത്തിന് കഴിഞ്ഞത് മുകളിൽ സൂചിപ്പിച്ച തരത്തിലുള്ള വൈവിധ്യവൽക്കരണം കൊണ്ടും ക്രിയാത്മകമായ പ്രവർത്തനങ്ങൾ കൊണ്ടുമാണ്.

ഈ പ്രസ്ഥാനത്തെ ആശ്രയിച്ച് ഉപജീവനം നയിക്കുന്ന ക്ഷീര കർഷകരുടെ ഉന്നമനം ലക്ഷ്യമാക്കിയുള്ള വിവിധ പദ്ധതികൾ മിൽമ ആവിഷ്കരിച്ച് നടപ്പിലാക്കിവരുന്നുണ്ട്. പാലുത്പാദന ചെലവ് കുറക്കാനുതകുന്ന രീതിയിലുള്ള ശാസ്ത്രീയമായ തീറ്റ ക്രമം, കുറഞ്ഞ ചെലവിൽ ലഭ്യമാക്കുന്ന തീറ്റ വസ്തുക്കൾ, എന്നിവയെ കുറിച്ചുള്ള അറിവുകൾ ക്ഷീര കര്ഷകരിലേക്ക് പടർന്നു നൽകുന്നതോടൊപ്പം തന്നെ ഭവന രഹിതരായ ക്ഷീര കർഷകർക്ക് വീട് നിർമ്മിച്ച് നൽകുന്ന ക്ഷീര സദനം പദ്ധതി, ക്ഷീര കർഷകരുടെ പെൺ കുഞ്ഞുങ്ങളുടെ വിദ്യാഭ്യാസത്തിനും വിവാഹ ആവശ്യങ്ങൾക്കും ധനസഹായം നൽകുന്നതിനുള്ള ക്ഷീര സുകന്യ എന്നറിയപ്പെടുന്ന ഒരു നിക്ഷേപ പദ്ധതി, തുടങ്ങി വിവിധങ്ങളായ ക്ഷേമ പദ്ധതികൾ മിൽമ നടപ്പാക്കി വരുന്നു.

ഇതോടൊപ്പം തന്നെ പാലിന്റെയും പാൽ ഉത്പന്നങ്ങളുടെയും വിപണനം വർധിപ്പിക്കുന്നതിന്റെ ഭാഗമായി കുടുംബശ്രീ, തദ്ദേശ സ്വയം ഭരണ സ്ഥാപനങ്ങൾ തുടങ്ങിയ വിവിധ ഏജൻസികളുമായി ചേർന്ന് സംസ്ഥാനത്തൊട്ടാകെ വിപണന കേന്ദ്രങ്ങളുടെ ശൃംഖല ശക്തിപ്പെടുത്തുന്നതിനുള്ള പദ്ധതികളും പരിഗണിക്കുന്നുണ്ട്.

ഉപഭോക്താക്കളുടെ ആവശ്യങ്ങൾക്കനുസൃതമായി വൈവിത്യമാർന്ന ഉത്പന്നങ്ങൾ വിപണിയിലിറക്കി സുസ്ഥിരമായ ഒരു വിപണി വില പാലിന് നൽകികൊണ്ട് നമ്മുടെ ക്ഷീര കർഷകരെ ഈ രംഗത്ത് സംതൃപ്തിയോടുകൂടി പിടിച്ചു നിർത്താൻ കഴിയുന്നു എന്നതാണ് കേരളത്തിലെ ക്ഷീര മേഖലയിൽ ഈ സഹകരണ പ്രസ്ഥാനത്തിന്റെ പ്രാധാന്യം.